(2010)

Natu sò u 31 di dicembre di u 1935 ind’un piazzile di u Falasorma chjamatu Chirchisani, cumuna di Galeria, d’un famiglione di pastori di Lozzi di u Niolu, si pò dì ch’e sò Niulincu è Falasurmincu. U Falasormu essendu a piaghja di l’altu Niolu. Indu ‘sse cuntrate, ci aghju passatu a mo sebiata zitellina incù i mo cari da la piaghja à la muntagna, fendu impiaghjere è muntagnere. À i diciottu verani, cum’è tanti giòvani Corsi di l’èpuca, mi sò ingagiatu indu l’armata (aviazione). Da la Francia, à l’Àfrica, à Sulinzara induve aghju avutu a furtuna di vultà, sò passati l’anni di a vita militare, felice in ‘ssu mentre d’avè truvatu u veru è sinceru amore cun quella chì mi hà rigalatu una ròsula è un fiore. In fine chì u ghjornu ch’elli mi anu parlatu d’insulcà torna l’onde, a mo scelta hè stata prestu fatta, mi sò firmatu in Cursichella. Dopu avè travagliatu una poca d’anni ind’è u civile cum’è riprisentante, aghju fattu ritornu indu e mo cuntrate care di u Falasorma è di u Niolu. Inturniatu da i mei, campu in armunìa cù a natura, l’inguernu à u pianu, l’estate à u monte, sempre primorusu di difende l’esse corsu, avendu spessu a musa per cumpagna. Eppo ci hè u chjama è rispondi, una di e mo passione chì mi face girandulà, da scuntrà l’amichi impruvisatori, indu e fiere, tundere o sirate quì è culà, induv’ellu nasce u cuntrastu sìa in loda o in disprezzu sicondu l’usanza antica. Qualchì volta ci accade ancu di parte in Italia, Sardegna, Cicilia o Spagna per scontri internaziunali d’impruvisazione. Incù issi pueti di prima trinca sò stonde prelebate è mumenti ricchi di spartera, chì a puesìa ùn hà fruntiere. Salutu a mimoria di tutti l’anfarti di Cursichella oghje smariti, da Minellu, à Pampasgiolu, U Furcatu, U Maggiurellu è tanti altri ch’e ùn possu cità... Abbracciu tutti l’amichi di u chjama è rispondi, giòvani, vechji è zitelli, dicènduli ch’e sò prontu à tèneli tasta quand’ella li pare, è qualunque sìa u sugettu. Inseme salvaremu u chjama è rispondi. È cusì sìa.

Anghjulu Francescu Simeoni, dettu Francescu di u Falasorma

ISBN : 978-2-905790-90-3

215 pagine

Prezzu : 15 €