Annu di marzu Paulu Zarzelli, u nosciu amicu fidu, chjusi i so ochja in eternu.
Pueta, scrittori, studiosu, fù un taccheru maestru di a lingua corsa, di a cultura corsa. Attraversu à u so amori à prò di u so paesi di I Peri amava a Corsica tutta quanta. Era attenti à ogni minuzìa di a ghjenti, di u locu, di a natura. Fù un tarcanu maiò di l’Essa corsu. È in ogni scrittu di soiu, o prosa o puisìa, dava empia balìa à un ghjudiziu chì pussidìa in gradu altu a capacità di spianà qualunqua quistioni chì arriguardava a Corsica.
A menti di chì l’hà cunnisciutu ferma impressa di a ghjintilezza di l’omu. Ch’edda fussi in i scola cù i ghjòvani, ch’edda fussi cù a ghjenti ch’eddu fraquintava in a vita d’ogni ghjornu, stava sempri à senta. Pari una cosa mìnima di dì : stava à senta. Ma si tratta propiu, parlendu di Paulu Zarzelli, di una virsura umana chì diventa scarsa.
Omu di pinsamentu, omu d’azzioni, cusì fù Paulu, ùn ispicchendu mai u pinsà è l’agì. Aia capitu chì trattinendu l’usi, a menti tratturrava à essa senza perda l’ànima propia. Fù u Priori fundatori di a cunfraterna San Larenzu di I Peri, avendu vistigatu l’antica strada assuffucata da a lamaghja di u smintecu, di a niglighjenza, di l’indiffarenza.
Furtunati semu stati d’avellu cunnisciutu, ch’eddu fussi statu cù noscu, Maestru di Vita vera è di Virtù alta. O Pà, à ringraziatti d’essa statu ciò chè tù fù. Semu urfaneddi avà chè tù ùn ci sè più. Emu pientu è singhjuzzatu. Ma hà tracciatu i segni di focu chì tuttugnunu vedi da luntanu. Vidènduli cannà u bughju tremu vidimu à tè, è tandu ci càntani l’anghjuli. A campa ci arrimbemu à tè, tù, chì sè a noscia petra tistimonia.

Rinatu Coti